დედა ეუბნება 4 წლის გოგლიკოს: - იცი რა ძალიან მიყვარხარ?! და შენ დედიკო, გიყვარვარ? გოგლიკო პასუხობს: - კი, მეც მიყვარხარ! დედა ეკითხება: და რატომ გიყვარვარ? გოგლიკო: - იმიტომ რომ ფაფას მიხარშავ!

ერთხელ 5 წლის გოგლა და ნოკა უყურებენ ტელევიზორს, სადაც აჩვენებენ ფილმს ნიკოლო პაგანინის შესახებ. უცებ გოგლა კითხულობს: "ნეტავ ეს მუსიკოსი რისგან მოკვდა?" ნოკა მაშინვე პასუხობს: "ისე ბევრი დაუკრა, რომ ქანცი გაუწყდა, დაიღალა და მოკვდა."

ერთხელ ოთხიწლინახევრის გოგლიკო ბებოს სთხოვს: "მიმღერე რა ის სიმღერა, დედიკო რომ მიმღერის ხოლმე?!" ბებომ სიმღერა თავისებურად შეასრულა. ბავშვმა სიმღერა რომ მოისმინა, ეუბნება: "ბაზარში დადიხარ და საჭმელს ყიდულობ, სახლს ალაგებ, სადილს აკეთებ, ნამცხვრის კეთებაც იცი და სიმღერა რატომ არ შეგიძლია?!"

ექვსი წლის დუდუმ მულტფილმის "მონსტრები უცხოპლანეტელების წინააღმდეგ" ნახვის შემდეგ განაცხადა:" მე ვიცი, რატომ გახდა ამ მონსტრების შემქმნელი მეცნიერი ბოროტი." მამა ეკითხება: "რატომ გახდა?" დუდუ პასუხობს:"იმიტომ რომ დედა არ ჰყავდა, რომ ეთქვა, რა ცუდად იქცევა და თანაც პატარა რომ იყო, სათამაშოებს ართმევდნენ."

3 წლის ნოკას ესმის რიგოლეტოს არია. დედა ეუბნება: "ნოკა, შენ უსმენ ჯუზეპე ვერდის ოპერას." ნოკა პასუხობს: "ალა, ჯუზეპე ბულატინოს თავგადასავალშია." დედას გაეცინა და თავისთვის ჩაილაპარაკა: :" წიწილა ასწავლის კრუხს." ნოკამ იწყინა და ერთხანს გაბუტული იჯდა. მერე კი მიუბრუნდა დედას, ჩახედა თვალებში და დამაჯერებლად უთხრა: " მე ადამიანი ვალ, გესმის, ადამიანი!"

3 წლის ნოკა: "დედიკო წყალი დამალევინე რა!.."დედა: "ნოკა, ალუბლის კომპოტი ხომ არ გინდა, ან ასკილის ჩაი, ან კაკაო?.."ნოკა (გაღიზიანებული ტონით): "დედიკო, ცვეულებლივი წკალი მინდა, ცვეულებ-ლი-ვი!"

5 წლის დუდუს დედა ეუბნება: "ჩემი გმირი, ჩემი ლომი...." . ბავშვი პასუხობს: "რრრრრრრრრ-ასოს ხომ ვერ ვიძახი, ლომი როგორ ვიქნები?!"

3 წლის დუდუ იყურება ფანჯრიდან და ამბობს: "უი, ავტობუსი!" "სად არის დუდუ ავტობუსი?"-  დედა ეკითხება, რადგან ვერ ხედავს. დუდუ პასუხობს: "წავიდა".

4 წლის დუდუს ეუბნება დედა : "შაბათს თოჯინების თეატრში წავალთ, სპექტაკლს დავესწრებით და შენ მაყურებელი იქნები". ბავშვი პასუხობს:"ალა, მე დუდუ ვიქნები".

4 წლის დუდუ წიგნს ათვალიერებს. ერთ-ერთ გვერდზე გამოსახულია მაგიდა, რომელსაც აკლია ერთი ფეხი. დედა  ეკითხება:"რა აკლია დუდუ ამ მაგიდას?" დუდუ პასუხობს:"საჭმელი".

4 წლის დუდუს ეკითხება დედა: "რისთვისაა ცეცხლი?" "გასათბობად"-პასუხობს დუდუ. "კიდევ?""მწვადების შესაწვავად." -ეუბნება დუდუ.

5 წლის დუდუს დედა აძლევს ოთხ ბარათს   და ეკითხება: "რამდენი ბარათი მიჭირავს ხელში?" დუდუ ართმევს ყველას და ღიმილით პასუხობს: "არცერთი, 0."

4 წლის დუდუმ ხელისგულზე მიიკრა სამი მონეტა და სიამაყით გაიძახოდა:"ჯადოქარი ვარ!" როდესაც მონეტები ძირს დაცვივდა, დუდუმ თქვა:"ჩემს მაგიას ელემენტები დაუჯდა."

5 წლის დუდუ დედას ეუბნება: - დედიკო, სულ მეყვარები, სულ მუდამ, მოხუცებული ქალიშვილი რომ იქნები მაშინაც კი.

ექვსი წლის დუდუს დედამ უთხრა, რომ ყველა ცოცხალი ორგანიზმი უჯრედებისგან შედგება. თვალსაჩინო რომ გაეხადა თავისი ნათქვამი, დედამ შვილს ლიმონის რბილობი აჩვენა და უთხრა: "ლიმონის ნაჭერს რომ შეხედო, თვალითაც კი დაინახავ უჯრედებს". დუდუმ ცოტაოდენი ფიქრის შემდეგ წამოიძახა:"მივხვდი! რამდენი ლიმონის უჯრედსაც ვჭამთ, მით უფრო მეტი უჯრედი გვემატება, ჰო?!"

სამი წლის ეკამ დააცემინა. დედამ უთხრა:"დიდი გოგო გაიზარდეო!" მერე დედიკომ დააცემინა. ეკამ პასუხად:"დიდი დედიკო გაიზარდეო!"